معركة الوعي الأسلامي - زهور المعرفة

معركة الوعي الأسلامي

********

محمد حسان فضل سنين يعمل شرايط كاسيت و يعيط ويتشحتف على وفاة سيدنا النبي , و يكلم الناس في التقوى و الزهد و انهم يتصدقو من مالهم ( اللي هو فتات ) لحد ما ربنا أكرمه و بقى عنده عشرات الملايين و فيلات وأسطول عربيات .

- عمرو خالد برضه تقوى و زهد وكلام زي الفل و الأخر يطلع بتاع فراخ , فراخ لما تاكلها هترتقي بروحك و تخليك تصلي التراويح و انت روحك مرتقيه و بتكاكي ( سبوبه حلوه يعمل منها قرشين ) .

- الإخوان جمعو مئات الملايين من الشعب في القرى و النجوع والمناطق الشعبيه , جمعو زكاة الناس و صدقاتها , و في النهايه نكتشف إن أغلب الفلوس دي بيصرفو منها على تنظيم إرهابي دولي و يشترو سلاح و يخزنوه , يعني الظابط اللي استشهد معاليك و هو بيدافع عن أرضك وعرضك مش بعيد تكون الطلقه اللي اتسببت في موته كانت من فلوس الصدقه بتاعتك.

- وجدي غنيم عاش سنين طويله يكفّر في مخاليق ربنا , كفر خلق الله كلهم في كوكب الأرض و المجموعه الشمسيه , باستثناء التنظيم الإرهابي و أمريكا وبريطانيا .

- يوسف القرضاوي بيستنجد بالجيش الأمريكي و البريطاني لضرب سوريا و ليبيا و لو فيه إمكانيه لضرب مصر يبقى خير وبركه .

- معز مسعود عمل قرشين حلوين من الدعوه و التجاره مع الله ( قصدي التجاره بدين الله ) وقطعة الحلوى بقى والذباب والكلام الجميل ده , وفي الأخر نكتشف ان قطعة الحلوى المكشوفه طعمها آلذ .

من سنين طويله نابليون بونابرت أدرك إن نقطة ضعفنا هي الدين فقال للمساعدين يعلنو في أرجاء مصر إنه اعتنق الإسلام ناس كتير من المصريين فرحو و هللو وسموه على بونابرت !! .

- معركتنا في الأساس معركة وعي يوم ماننتصر في المعركة دي هانبقى عدّينا و محدش في الكون هيبقى زينا، فرق شاسع فرق السما من الأرض مابين التدين ( والسذاجه ) المعركة الحقيقية هي ان لا تكون ساذج لا بداعي التدين ولا بأي داعي تاني، الطمّاع و النصاب يلزمه جاهل وساذج , وإلا مكانشي معز مسعود و عمرو خالد وحسان وغنيم والقرضاوي ونابليون بونابرت لقو أكل عيش عندنا .دين ربنا يا بني أدمين مش كيميا ولا لوغاريتمات ولا محتاج إخوان وسلفيين و وهابيين ولا محتاج جماعات و تنظيمات وبهاليل ، دين ربنا إسمه المعامله عامل الناس بما يرضي الله، ماتسرقش , ماتكدبش , ماتقتلش ( و لا تحرض عالقتل ) , ماتزيفش , ماتزنيش , ماتشهدش زور، ماتغتابش، صلي فروضك الخمسه وصوم رمضان وحج لو تقدر، وبر والديك، و طلع زكاتك و صدقتك في إيد الفقير المحتاج من غير وسيط من غير جمعية ولا جماعة ولا شوية نصابين وزلنطحيه عشان انت مش عارف زكاتك هتروح فين والفقرا والله مش في كوكب تاني هتلاقيهم جنبك و حواليك في كل مكان . لو عندك إستفسار في الدين أو معضله مسألة مواريث أو حاجه عايز تتحرى فيها الحلال و مش عارف اسأل دار الإفتاء ومشيخة الأزهر، هتلاقيهم بيردو عليك، كيانات مسئوله عن فتواها، علماء دين مش صبي فرارجي ربى دقنه وبقى اسمه شيخ .

- وأخيراً وأهم حاجه ماتقعدشي قدام أي شيخ في الدنيا وانت لاغي عقلك لو لقيته بيهبل و يعجن هاته من ياقة الجلابيه وامسح بيه بلاط الجامع على مسئوليتي وتأكد إن لحوم العلماء مش مسمومه ولا حاجه خصوصا لو كانوا تجار دين .