شبكة المعارف - زهور المعرفة

شبكة المعارف

*****

أكبر خدعة ممكن تقع فيها، هي إنك توهم نفسك بأنك "محبوب والكل صاحبك" لمجرد إن تليفونك مابيبطلش يرن، أو لأن قايمة أصدقائك مليانة بالأسماء، والفرق مرعب بين إنسان عنده "شبكة معارف واسعة"، وبين إنسان بيمتلك "دائرة أصدقاء عميقة"..
الأولى بنملك فيها عناوين وأرقام ونفتكر إننا مسنودين بالكترة، أما التانية فهي بس اللي بنلاقي فيها الأيد اللي بتتمدلنا بجد في عز ما احنا مهدودين، والخدعة اللي معظمنا بنقع فيها، هي إننا بنقيس قيمتنا بـ "كم المعارف"، ونسينا إن اللي بيفرق في العلاقات عمقها مش كترتها."شبكة المعارف" دي ناس بنسلم عليهم، بنخلص معاهم مصالح، بنقابلهم في المناسبات بابتسامة رسمية.. يعني ممكن تكون شبكة مفيدة لشغلنا، بس خطر جداً لو قلبنا اتسند عليها، ودايرة أمان عمرنا ما نلاقيها في الزحمة. لأن الأمان بيعيش في الدائرة الضيقة اللي حوالينا. الدايرة اللي فيها أشخاص يتعدوا على صوابع الإيد. عارفين حقيقتنا، شايفين تعبنا، وبنحكيلهم أسرارنا واحنا مطمنين إن ضهرنا محمي. يا ريت مانستنزفش طاقتنا وعمرنا في سوء تقديراللي حوالينا، ويا ريت نتعلم إزاي نفلتر الدواير بوعي، ونحط كل واحد في مكانه اللي يستحقه. لأن زحمة الوشوش ممكن تنفعنا بس واحنا واقفين على المسرح والكل بيصقّف لنا، لكن لما الستارة تنزل والأنوار تنطفي. مش هيفضل معانا إلا اللي اخترناه واخترنا "بدون مصلحة" عشان نسند بعض، مش عشان نكمل لوحة المظاهراللي بنجامل فيها بعض.