الراحــــة - زهور المعرفة

الراحــــة

***

اذا كنت تريد الراحة إعمل بنصيحة الأمام الجوزي : إكتم عن الناس ذهبك، وذهابك، ومذهبك.

** أما ذهبك :

فحالتك المادية ودخلك لا تحكي عنهم ، لو كان معاك متتحسدش ويطمعوا فيك، ولو مش معاك محدش يعاملك بشفقه ويستقل بيك،

** وأما ذهابك: بمعني إن لو مقدم وظيفة جديدة متقولش الا لما تتم، لو جايلك عريس متقولييش، رايح تخطب متسيحش، ربنا سهلك في أي خطوه متفضحش الدنيا وإسكت. إمسك لسانك وهتلاقي خططك بتتحقق كأنها بتجري، سيدنا يعقوب أبو سيدنا يوسف قاله لا تقصص رؤياك علي إخوتك فيكيدوا لك كيدًا! تخيل خاف إنهم يحسدوه رغم إنه كان مجرد حلم! وبخصوص "وأما بنعمة ربنا فحدث" فمعناها متنكرش نعمة ربنا عليك وإحمده علي كل حال وإلبس وكل كويس ولكن تستر بنفسك ومتتفاخرش برزقك.

** واما مذهبك : يعني ميولك وأفكارك، بتحب إيه وبتكره إيه ،عشان متدخلش في جدال فارغ وتوجع قلبك بحوارات ملهاش اي لزوم، ولو عاوز ترتاح متنصحش اللي مطلبش نصيحتك، إلا لو كان شخص بيكبر بيك ومش هيندمك علي كلامك معاه، خلي بابك مقفول وساعتها هتفضل محافظ علي زهوتك ولمعانك في نظر اللي حواليك، يقول سيدنا عمر بن الخطاب: ندمت علي الكلام مرات، وما ندمت علي الصمت مرة.!