الصلاه يامؤمنين الصلاه

الصلاه يامؤمنين الصلاه

*******

نزلت اصلي الجمعه لقيت الجامع اللي متعود اصلي فيه شبه خلص صلاه ، قومت روحت بسرعه للجامع التاني اللي في اخر الشارع لاقيتهم بيقيمو الصلاه ، قولت كويس و لقيت مكان في الشارع اقف فيه بالعافيه، حظي الجميل وقفني بجانب طفل(خمس سنين مثلاً) اقل ما يقال عليه عيل مجنون ، الصلاه بدأت وابتدي الطفل ده يطلع خطوه لقدام و يبحلق في وشي من مسافه شبرين، شويه وابتدي يرقص حواجبه، طبعا انا تجاهلت الموضوع خالص وقلت طفل بقا والاطفال احباب الله وشويه ولقيتُه كل ما اسجد يقرب ودانو مني اوى ويوشوشني ويقولي :هو انتا بتقول ايه ؟ طبعا انا كل ده متجاهله وماسك نفسي من الضحك بالعافيه و لما خلصت سجود لقيتُه بعلو صوتو بيقول ، سمعتك يا حلولي هاهاها انتا بتقول صو صو صو صو صح؟ وبرضو مبحلق في وشي ابتديت ادعي ربنا انه يصرف عني الواد ده، تقريبا هو ترجم سكوتي ده بإني راضي وغير معترض علي تصرفاته ، ابتدي يحط ايده في جيوبي في محاوله منه لإستكشاف محتويات هذا الكائن الصامت اللا مبالي اللي مش بيرد عليه، فمسكت ايده فجأه ونزلتها جمبه فضحك بصوت عالي ودي كانت البدايه ، ابتدي يتعامل مع الموضوع علي إني باضحكه وكرر الحوار خمس مرات وهو مسخسخ، كل اللي فات ده بالنسبالي عادي . الصدمه كانت في اول ثانيه بعد انتهاء الصلاه، لما لاقيته بيسلم عليا بنتهي الوقار وبيقلد الناس وبيقولي تقبل الله، في اللحظه دي محستش بنفسي غير وانا بقوله بصوت عالي "وحيات امك" لقيت الناس كلها بتبصلي بإستغراب ماعدا الراجل اللي كان بيني وبينه كان ميت ضحك لأنه كان حاضر معانا المسرحيه من الاول، المهم بصيت للواد وقولتله انتا مين يابني وابوك فين قالي بابا في البيت، قولتلو بابا مجاش يصلي ؟ قالي بابا مش بيصلي. ساعتها سامحت الواد علي كل اللي عمله معايا يكفي انه قرر يصلي لوحده في السن ده وبوسته وبقينا اصحاب، قولتله اسمك ايه ؟ قالي انا مايكل يا عمو، قولتله تاني "وحياة امك "عموماً الاطفال احباب الله، وخاصة مايكل"