النفس الشبعانة - زهور المعرفة

النفس الشبعانة

*****

النفس الشبعانة ما بتعرفش تبص في حياة غيرها ولا عيشة غيرها، ولو صَدر منها مُقارنة لا إرادياً، بتلحق نفسها وتفتكر النِعم اللي معاها ودايماً معترفة بكرم ربنا عليها وادراكها للنِعم بيعززّها في نظر الكل.

النفس الشبعانة مُكتفية، و راضية، قابلة بالظروف وموافقة بالمقسوم، ومُقتنعة بإمكانياتها ومُستغنية بفضل ﷲ.

النفس الشبعانة مُقتنعة جداً إن في أرزاق أهم مكانة من المال، أرزاق تتلخص في محبة الناس ليها ورضا النفس عن النفس، ودعوة ابن صالح ولمّة العيلة، أو زوج متفاهم و زوجة صالحة وأخ حنون أو صُحبة وعِشرة صالحة واضحة مش مُزيفة، أو توفيق من ربنا في أمر ما، أو دعوة مستجابة أو شوية صحة، أو قُدرة على ابتلاع الصعاب.

النفس الشبعانة مش محتاجة تتفاخر باللي بتملكه،ده ساعات بيكون أكبر طموحها قعدتها على أي رصيف مع ناس بتحبها وبيحبوها بجد، وده منتهى السعادة والثواب بالنسبة لها.

النفس الشبعانة نفس راقية لا بتعرف تتظاهر بدور مش دورها ولا بمستوى يعلو مستواها ولا بتتفاخر بمظاهر كدابة ولا بتتباهى بنعمة، لأنها بتشوف إن التباهي ده نقص وشعور بالعجـز وضعف وقلة حيلة وعدم قُدرة على التميّز.

النفس الشبعانة مُختلفة لا بتعرف تحسـد ولا تحقـد ولا بتقلد غيرها ولا بتنافس، نفس جذابة، اختلافها جذاب، ليها وقار كده بتقدر تجعل صاحبها كبير و وقور في عيون الناس، كبير بأفعاله مش بشكله .

النفس الشبعانة نفس متواضعة حرفياً، بتعرف تكتشفها في الأزمـات والشدائد، أجدع نفس ممكن تقف جنبك بدون مُقابل، نفس غنيّة بمعنى الكلمة، غنيّة رحمة وعدل وعرفان وحنيّة وبتفضّل سعادة غيرها على سعادتها .

من عيوب النفس الشبعانة : كتير بتتنازل عن حقوقها، مش بس مادية ، دي بتتنازل عن حقها في المشاعر والرأفة والاحساس بيها، بتيجي على نفسها في سبيل إرضاء غيرها وعمرها ما تفكّر تحسسك بإحتياجها أو انكسارها في عز ضلمتها قادرة تملأ قلبك بالنور .