زراعة الخُضر والفاكهة في البلكونه وعلي سطح البيت

زراعة الخُضر والفاكهة

في البلكونه وعلي سطح البيت

*****

أولًا: السطح

* نضّف السطح كويس: مهم جدًا تنضفوا السطح من أي حاجة، ويا ريت تعملوا كده عشان الفئران اللي بتبهدل الدنيا، وزي ما عارفين، هدفنا من زراعة الأسطح إننا نقضي على الفئران دي كمان. 😉

* افرشوا عازل: افرشوا مشمع بلاستيك أو أي حاجة تعزل الأرض قبل ما تزرعوا. خدوا بالكم في الصور ممكن تلاقوا شكاير محطوطة على الأرض مباشرة، وده غلط! الأفضل تجيبوا ترابيزة وتحطوا عليها الشكاير، وتحطوا تحت الزرع طبق أو أي وعاء يستقبل المية الزيادة اللي بتنزل وقت الري، عشان السقف ما يتأثرش.

ثانيًا: الوعاء اللي هنزرع فيه

بص يا سيدي، ممكن تجيب قزايز المية الفاضية وتقطع الجزء اللي فوق منها، أو تشتري قصاري زرع جاهزة من أي محل بتاع حديد وبويات أو من أي حد بتاع دهانات شاطر، أو من أي محل بيبيع أدوات زراعة لو مفيش أي حاجة عندك تنفع، المهم يكون عمقها حوالي 20 سم. وممكن كمان تستخدم علب الدهان البلاستيك او الجراكن، بس تخرموها من تحت أربع تخريمات عشان المية الزيادة تتصفى. ولو شيكارة أسمنت أو أي شيكارة قماش نضيفة، يبقى أحسن كمان.

ثالثًا: التربة وهي الأهم:

* التربة العادية: رمل + نشارة خشب + مخلفات طيور حمام أو عصافير أوأرانب أو ماعز + تربة طينية من أي جنينة قريبة منكم. لو هتزرعوا في شكاير أو علب أو جراكن، ركزوا في الكميات : ربع الشيكارة رمل + ربع الشيكارة طينة أو تربة طمي +ربع الشيكارة أو العلبة مخلفات الطيور مخلوط بورق شجر ناشف مطحون بإيديكم +ربع الشيكارة نشارة خشب ناعمة من أي ورشة نجارة

* التربة الصناعية: دي بقى بنشتريها جاهزة من أي مشتل أو محل بيع مستلزمات زراعية. مكوناتها: رمل + بيتموس + بيرلايت + نشارة خشب + مخلفات عصافير أو طيور أو كمبوست. )البيتموس ده بيكون عامل زي قالب الطوب، فتبلوه بالمية وتفتتوه كويس وتخلطوه مع البيرلايت). الشيكارة منه بتتباع بحوالي 50 جنيه تقريبًا، والبيرلايت بيتباع معاه.هتخلطوا نفس الكميات اللي فوق: ربع شيكارة رمل مع ربع شيكارة بيتموس مع ربع بيرلايت مع ربع نشارة خشب ناعمة، ومعاهم مخلفات العصافير. كله يتخلط كويس وتعَبُّوا بيه الشيكارة أو الجردل وتسيبوا مسافة 5 سم فاضية من فوق. ملحوظة مهمة جدًا جدًا بخصوص الرمل: ركزوا في النقطة دي كويس أوي! الرمل هتجيبوه من أي بتاع مواد بناء أو من على الطريق، أو لو في منطقة صحراوية ومتوفر فيها الرمل، بس لازم تغسلوه!!!كيفية غسيل الرمل؟ ضع الرمل في كيس أو شيكارة ونخرمها من تحت، ونصب عليها مية حوالي خمس مرات عشان نتخلص من أي أملاح ممكن تأثر على النبات.

رابعًا: الزراعة (الفلفل والباذنجان والطماطم نفس الطريقة)

* إنتاج الشتلات من البذور:

هتجيبوا علب زبادي عادية أو صواني زراعية فوم تباع عند بتوع الأدوات الزراعية والمشاتل، أو ممكن أي صواني عندكم في البيت. هتفرشوا فيها أي نوع من أنواع التربة اللي فوق دي بسمك 5 سم، وتجيبوا البذور وتبدروها على الصينية، أو تزرعوا بذرة بذرة بإيديكم بعمق 1 سم وتغطوها بالتربة وترووها كل يوم لحد ما تنبت لمدة أسبوع. وبعد كده تبدأوا المرحلة التانية للزراعة، اللي هي:

* نقل الشتلات: هتبدأوا عادي جدًا تشيلوا شتلة شتلة بإيديكم، وتكونوا مجهزين الشيكارة أو الجردل أو القصيص بالتربة المخلوطة. تحفروا بإيديكم حفرة عمقها 5 سم، وتنزلوا الشتلة فيها وتغطوها بالبيتموس والرمل أو الرمل والطينة، أي حاجة من اللي جهزتوها.

خامسًا: الري : يكون مرتين في اليوم، أو تلات مرات في الجو حر جدًا، والري بالرشاش. ممكن تعملوا رشاش بسيط في البيت : تجيبوا إزازة مية وتخرموا الغطا بتاعها تخريمات كتير بمسمار، هتبقى زي الرشاش وتسقوا بيها.

سادسا : لمقاومة الأمراض والآفات (طريقة طبيعية 100%): لا تستخدموا المبيدات! للزراعة الأورجانيك بل:

* مستخلص الثوم: وهو حوالي 5 فصوص ثوم طازج، تطحن وتضاف على لتر مية، وبعدين تاخدوا المية الصافية اللي فوق دي وترشوا بيها النباتات كل أسبوعين عشان تقاوموا الآفات الفطرية والحشرية.

* محلول الخميرة والسكر:

ممكن كمان تخلطوا معلقة خميرة مع معلقتين سكر على لتر مية، وبعدين تحطوها في التلاجة لمدة يوم، وترشوا بيها النباتات كل أسبوعين عشان تقاوموا الأمراض الفطرية.

ملاحظات مهمة جدًا بنأكد عليها:

* اغسلوا الرمل كويس قبل ما تزرعوا بيه.

* ازرعوا شتلة واحدة بس في العلبة أو الشيكارة، أو اتنين بالكتير. ولو بتزرعوا في أحواض كبيرة، يبقى تسيبوا مسافة 40 سم بين كل شتلة والتانية.

* عشان تحموا الزرع من العصافير، هاتوا عصاية وعلقوا عليها أسطوانة سي دي قديمة بخيط، عشان بتعكس الضوء والعصافير بتخاف منها وبتمشي. حطوها جنب النبات.

* بالنسبة للفئران، نضفوا السطح كويس واعملوا مصيدة عشان تمسكوهم.

* حطوا طبق أو أي وعاء تحت القصيص أو الشيكارة اللي زرعين فيها عشان يستقبل المية الزيادة اللي بتنزل، ومتبهدلش السطح مية.