أنواع القهوه بالنسبه للسكر

أنواع القهوه بالنسبه للسكر

**********************

القهوة من المشروبات الساخنة الشائعة ، وهي مشروب عالمي يُصبع ويُقدم بطرق مختلفة مع أضافات مختلفة كالهيل ، وتُفضل صباحاً ، ورغم سهولتها في الإعداد فهي صعبة في الحفاظ علي وش القهوة وظبط السكر . وأنواع القهوة في مصر هي :

1- السرياقوسي :القهوه السرياقوسي عباره عن 3 معالق سكر لكل ملعقه بن(3 سكر : 1 بن ) ، ومعظم عشاقهاغالبا من حديثي شُرب القهوه اللي لسه متلطوش في الحوار أو من النوع اللي بيشربها كل فين و فين. وتفضلها النساء في المجمل فهي قهوه طريه لزوم الشاب الطري .

2- الزياده : القهوه الزياده تكون ملعقتين سكر لكل ملعقه بن (2سكر : 1 بن ) وهي المدخل الي عالم إدمان القهوه اللذيذ ؛ ﻷن سكرها الزياده بيكسر طعم البن المر للمبتدئ غيرالمتعود عليه . ومُحبي تناول القهوه الزياده ؛ في الأغلب يهتموا بالمظهر علي عكس الجوهر ، ويحبوا ان يعيشوا التجربه من السطح بدون التطرق للأعماق و بيقفشوا جداً لو القهوه جاتلهم ناقصه سكر و دا يدل علي خوفهم من كل ما هو مظبوط .

3- المانو : القهوه المانو هيا الوسط بين المظبوط و الزياده ؛ ملعقه و نصف سكر لكل ملعقه بن (1.5 سكر : 1بن) ، والمانو غالباً نلجأ لها في حالتين : إما زهق من الزياده و عايز تنتقل للمظبوط و بتتعود تدريجياً علي تقليل السكر ، يا إما إنت كييف مظبوط بس بتقعد علي قهوه شغال فيها صنايعي فاشل و عمره ما عرف يظبط قهوتك فتضطر تطلبها مانو بنيه المظبوط و التكتيك دا ناجح تماماً مع القهوجيه الفشله . والمانو مرحله إنتقاليه مينفعش تقف عندها كتير ﻷنها ملهاش توصيف دقيق في علم القهوه و الأمزجه !

4- المظبوط : واحد علي واحد (1 سكر : 1 بن ) قهوه متكافئه تماماً للسواد الأعظم من المدمنين ، و قهوتك المظبوطه تدل علي شخصيتك المتزنه العادله اللي مبتحبش حاجه تيجي علي حساب حاجه ،إستمتاعك بطعم البن بكميه سكر متوازنه بيخلق جو من السعاده المفرطه التي لا تنتهي سوي مع أخر رشفه من الكوب ، بإختصار كييف القهوه المظبوط إنسان برنس في نفسه ﻷقصي درجه.

5- علي الريحه : مبدأيا هي مزاج المدمن العاشق للقهوة (0.5 سكر : 1 بن ) مع السكر القليل و طغيان طعم البن ، نحن أمام قهوه صنعت من أجل المزاج العالي. والقاعده العامه ، كلما قلت نسبه السكر بالنسبه للبن ، زادت درجه إدمانك و برنستك و ميزاجك.

6- القهوه الساده: تجربه مختلفه ولو مش قدها لا تجربها ، عندما تكمل الفنجان بدون ما بطنك تقلب و نفسك تقفل معناها ولاده وحش جديد مبيخافش من أي حاجه بطل لا تقهره الظروف .