حقائق وتواريخ - زهور المعرفة

حقائق وتواريخ

************

الي بعض من يسمون انفسهم النخبة أو المثقفين أو الساسة العرب

* فلسطين لم تضيع في 1948 هذه أكبر كدبة عشناها في التاريخ. لأنها ضاعت قبلها بسنين طويلة اوي. العالم العربي اللي تم احتلاله من العثمانيين مع انهيار دولة المماليك وسقوطها في مصر بالأساس سنة 1516، فقد كتير من هيبته وحدوده وامكانياته في ظل الاحتلال ده. فيه تواريخ مهمة تقولك إن فلسطين ما راحتش سنة 1948 لكن منقبلها،و ارجوك تقدر تراجعها كلها.

- 1909 تأسيس وإنشاء مدينة تل أبيب في فلسطين كمستوطنة يهودية في ظل الحكم العثماني...وقتها كان ما يسمى خليفه المسلمين في تركيا هو السلطان عبد الحميد اللي وافق وقبل انشاء مدن يهودية في قلب فلسطين عادي يعني، 1917 كان وعد بلفور البريطاني بإنشاء وطن قومي لليهود في فلسطين بعد انهيار الدولة العثمانية، -1919 معاهدة فيصل - وايزمان بالموافقة على وعد بلفور وانشاء مجتمع لليهود في فلسطين. مين فيصل؟ الامير فيصل الأول ابن حسين بن علي الهاشمي، ممثل المملكة العربية الحجازية. مين وايزمان؟ حاييم وايزمان رئيس المنظمة الصهيونية العالمية، وقعت الاتفاقية فين؟ في مؤتمر باريس للسلام 1919بعد الحرب العالمية التانية واللي اتعرف باسم مؤتمر الصلح.

من 1919 -1948 نشطت العصابات الصهيونية في فلسطين بعد توافد الاف اليهود من كل دول العالم. كان اسمها الهاجاناة كانت بتقتل و ترهب وتهجر واللي اتفق معاهم ساكت وخايف على مملكته في العراق او الاردن او السعودية. في نفس الوقت اللي فلسطينيين كتير بحكم الجهل أو الاستسهال كانوا بيبيعوا اراضيهم ويسيبوا فلسطين ويروحوا الكويت ولبنان والاردن والسعودية واوروبا وامريكا الشمالية والجنوبية.

مايو 1948 اعلان قيام دولة اسرائيل واعتراف العالم بيها في اسرع وقت، اول دولةاعترفت بيها من المنطقة كانت تركيا وايران، أه والله. و ما هانش على مصر تروح فلسطين لكن ما كانتش تملك الوسيلة و لا الجيش الحقيقي ولا التسليح ولا التخطيط. وراح الجيش العربي قوات وكتايب من مصر والاردن وسوريا والعراق ولبنان و السعودية تحارب جيش منظم، وتخيل معايا حال القوات دي اللي هي في دول محتلة من فرنسا وبريطانيا بما فيها مصر، وهي رايحة تحارب دولة زرعتها وقوتها وسلحتها بريطانيا وفرنسا...قمة المأساة رغم استبسال الجدعان وخصوصا من مصر.

حرب ورا حرب من 1948-1967 واحنا بنخسر و سط طوفان دولي لحد ما راحت سينا والجولان والقدس الشرقية والضفة الغربية في 67. اسرائيل رفضت تعترف غير بمنطق القوة...ورغم انها ضاقت المر على ايدينا في حرب الاستنزاف، إلا أنها رفضت تتفاوض على السلام اللي سعى ليه عبد الناصر والسادات قبل اكتوبر 73 لكنها رفضت بغطرسة.

اكتوبر 1973 ما كانش ادامنا غير اننا نرجع كرامتنا وارضنا ونعرفها اننا مش سهل...حاربنا بنص الاماكانيات، حاربنا رغم كل معوقات الحرب وانتصرنا واتهزت اسرائيل و ساعتها كان مصلحة امريكا توقف الحرب وتفرض صوتها في المنطقة...وكان مصلحتنا نقف عند اللي حققناه لأننا مش حنحارب امريكا. وبدأت المفاوضات في الكيلو 101 وفض الاشتباك في 1974 ، وجمدت الدنيا من جديد لا حرب ولا سلام.

1977 كان فيه زعيم مصري ايقن إن الأمور ما ينفعش تتساب اكتر من كده فكان خطابه اللي هز العالم انه مستعد يروح الكنيست. السادات ما حطش اسرائيل قصاد العالم وبس، ده حطها قصاد اليهود اللي عايشين فيها وخايفين من قتل عيالهم في حروب جديدة. السادات قال نرجع لحدود 4 يونيو 1967 ونتفاوض. ورفض العرب و اعلنوا خيانة السادات وقاطعوا مصر و اغتالت ايد فلسطينية وزير الثقافة المصري الراحل يوسف السباعي في قبرص. ما خفناش وكملنا لأننا على الحق وحطينا علم كل دولة ليها ارض على ترابيزة المفاوضات في ميناهاوس اوبروي في الجيزة رغم غيابهم. ورفضنا نفرط في حاجات مش ضمن حدود مصر رغم غياب صاحب المصلحة، واخدنا سينا كاملة حتى اخر كيلو فيها في طابا سنة 1989.

1990 قرر العراق غزو الكويت واحتلالها وضمها للعراق. عارضت مصر وقالت ما ينفعش انتم كده بتدوا امريكا صك دخول الخليج...ما حدش سمع والغريبة ان الاردن واليمن ومنظمة فتح اللي بتمثل الفلسطينين وزعيمها عرفات ايدت صدام حسين في غزو الكويت ودعمته!! اه والله رغم ان الفلسطينيين عايشين في الخليج من سنين، وبدل ما نحرر فلسطين كنا بنحارب عشان نحرر الكويت!!! شفت خيبة اكتر من كده .

1991 كان مؤتمر مدريد للسلام قبل العرب يقعدوا مع الاسرائيليين وياخدوا ربع اللي كان بيتفاوض عليه السادات في 1977، كل ده والقدس بقرار من الكنيست عاصمة اسرائيل وبقرار من بيل كلينتون سنة 1996 عاصمة اسرائيل

2007 اول انتخابات للسلطة الفلسطينية في غزة ورام الله بين فتح وحماس وكام ميليشيا مسلحة، وفازت حماس الذراع العسكري للاخوان وقامت الحرب بين فتح وحماس وقتلوا بعض ودبحوا حتى الاطفال بأبشع مما عمل الاسرائيليين فيهم...وضاعت فلسطين والقضية وبقى همنا نصالح الفلسطينين... اللي كانوا اول ناس تاجرت بقضيتهم واتربحت منها وبقى حل القضية مش في صالح قيادات عملت ملايين حطيتها في حسابها في بنوك بره واسألوا سها عرفات وقيادات حماس وفتح .

كل ده ومصر حاضرة، حامية..ناصحة للقضية اللي هي قضية امن استراتيجي سواء قبلت او اعترضت، وسواء جت الخيانة من اللي قدمت لهم حماية و ضهر يتسندوا عليه فضربوها في اول اختراق للحدود في 2009 لما اجتاح معبر رفح عشرات الالاف من الغزاوية وكانت كلمة مبارك للتاريخ يخرجوا من غير طلقة رصاص واحدة مش عايز يتقال مصر موتت فلسطينيين. لكن ما صانوش الكلام ده وكانوا شركاء الاخوان في اقتحام السجون في 2011 و تهريب القيادات من حماس والاخوان وحزب الله اللي كانوا متهمين في السجون المصرية...غير الفوضى و القتل والقنص لاشعال الشارع.

كل ده واسرائيل 100 فل وعشرة مبسوطة بخيبتنا وفوضى بلادنا اللي خططت ليها مع الاخوان والملالي وامريكا من 1977 واقرا كتاب رهينة في قبضة الخوميني لروبرت ترايفوس اصدار عام 1981 في امريكا عشان تفهم.

كل ده وكل دول العالم العربي في علاقات سرية عميقة مع اسرائيل اللي قاطعوا مصر عشان رجعت ارضها بسلام بارد معاها. وعلى رأس الدول دي قطر اللي كانت بتنفذ كل حاجة مع اسرائيل وهي موعودة انها تكبر وتتسيد العرب بفلوسها. قطر كانت عارفة انها صغيرة المساحة واسرائيل اقنعتها ان الموضوع مش مساحة لكن تأثير والدليل اسرائيل نفسها، يا سلام على العروبة والاخوان والملالي، تركيا قاومت اسرائيل وتعتبر تطبيع الامارات خيانة!!!!..

دي بقى اكبر كدبة ، عفوا أكبر نكتة ممكن تسمعها...تركيا ما كانتش شريك في تأسيس تل ابيب من 1909 وبس، لا دي طبعت مع اسرائيل في 2016 في معاهدة رسمية تم توقيعها بين اردوغان ونيتنياهو، تطبيع رسمي فهمي نظمي، يعني لو من شروط الامارات وقف ضم اراضي لاسرائيل، كان شرط اسرائيل لتوقيع التطبيع مع تركيا اسقاط سوريا عشان يمر فيه انبوب غاز اسرائيلي لسوريا لتركيا ومنه لاوروبا، لكن مصر رغم كل ظروفها وللاسف قبول السعودية والخليج بوقوع سوريا ، رفضت مش حبا في بشار اللي لينا عليه مليون علامة ضياع، لكن عشان نحمي بلد من انه يضيع زي العراق.

التطبيع يعني النهاية وقبول اسرائيل.

لا التطبيع مش النهاية بدليل اننا في مصر عقيدتنا بتقول اسرائيل عدو رقم 1 في حياتنا وحيفضل ليوم الدين. التطبيع نهاية لو فضلنا ما نتعلمش وما ننتجش و ما نشتغلش...التطبيع نهاية لو ما افتكرناش هويتنا وتاريخنا واخلاقنا، التطبيع نهاية لو ما قدرناش ندرك حجم المخاطر اللي بتواجهنا.

وقريبا يدون التاريخ الربع الأول وعام الحتمية ٢٠٢٢ وتحضيرات الحرب العالمية التالتة ونهاية الحضارات.

العرب فهموا ومشيوا خطوة عملتها مصر بعد 41 سنة ، بس فرق السن كبير وفرق الشجاعة اكبر وفرق الفهم للصورة اليوم الدين مسئولية.

انتبهوا لخطة التركيع الإقتصادى ليأتى الدور العسكرى .

راقت لى